News

Previous Next

የኢትዮጵያ ዳያስፖራ ማህበር የመዋቅርና የአሰራር ችግሮችን በመቅረፍ ሁሉንም የክልል ዳያስፖራ ማህበራትን የሚወክል አቋም እንዲኖረው በማስቻል ላይ ያተኮረ የክልል ዳያስፖራ ማህበራት የተሳተፉበት የምክክር መድረክ በውጭ ጉዳይ ሚኒስቴር የመሰብሰቢያ አዳራሽ ተካሄደ።

የኢትዮጵያ ዳያስፖራ ኤጀንሲ ዋና ዳይሬክተር ወ/ሮ ሰላማዊት ዳዊት መድረኩን ሲከፍቱ ባስተላለፉት መልዕክት ኤጀንሲው ማህበራትን መደገፍ በሃላፊነት ከተሰጡት ተግባራት አንዱ መሆኑን አንስተው፣ የማህበራት ተወካዮቹ በጋራ በመስራት ኢትዮጵያን የሚመስል ማህበር በመመስረት በጎ ተጽዕኖ ማሳደር የሚችልና እርስ በእርሱ በመናበብ ለላቀ ዓላማ የሚተጋ አደረጃጀት እንደሚፈጥሩ ያላቸውን ተስፋ ገልጸዋል።

የማህበራት ተወካዮቹም ማህበሩ ሊኖረው በሚገባው የተስተካከለ መዋቅርና አሰራር ዙሪያ ሃሳባቸውን አቅርበዋል። በመድረኩ ከተንጸባረቁ ሃሳቦች መካከልም ነባሩ ማህበር ያሉት ጠንካራ ጎኖች ተወስደው፣ የተበላሹና መልካም ያልሆኑት ተትተው፣ የተሻለ ነገር መገንባት ይገባል የሚለው አንዱ ሲሆን፣ በሌለም በኩል አስፈላጊ ሆኖ ከተገኘ ከየክልሉ በተውጣጡ ተወካዮች አማካኝነት እንደአዲስ ይደራጅ የሚል ይገኝበታል። የመድረኩ ተሳታፊዎችም በቀረቡት ሃሳቦች ላይ ሰፊ ጊዜ ወስደው ተወያይተውባቸዋል። በመጨረሻም ተወካዮቹ በደረሱበት ስምምነት መሰረት በአንድ ሰብሳቢና ጸሐፊ የሚመራ ሰባት አባላት ያሉት ኮሚቴ በማቋቋም በአንድ ወር ጊዜ የኢትዮጵያ ዳያስፖራ ማህበር ሊከተላቸው የሚገቡ የአደረጃጀት አማራጮችንና ስልቶችን ለይተው ያለቀለት ምክረ-ሃሳብ ለኤጀንሲው ለማሳወቅ ተስማምተዋል።

ከሳምንታት በፊት ተካሂዶ በነበረው የፌዴራልና የክልል የዳያስፖራ ባለድርሻ አካላት መድረክ ላይ በሃገር ውስጥ የሚገኙ የዳያስፖራ ማህበር አደረጃጀቶችን ማጠናከር የሚቻልበት ሁኔታ በአጀንዳነት ተይዞ ውይይት እንደተደረገበት መዘገባችን ይታወሳል።

Previous Next

ላለፉት ስምንት ዓመታት በሐዋሳ ከተማ በሳውዘርንጌት ኢንቨስትመንት አክሲዮን ማህበር ሊገነባ ታስቦ በልዩ ልዩ ምክንያት ሲጓተት የቆየው ዘመናዊ የገበያ ማዕከልና የቢሮዎች ህንጻ ኮምፕሌክስ  ፕሮጀክት የግንባታ ስራ የኢትዮጵያ ዳያስፖራ ኤጀንሲ ዋና ዳይሬክተር ወ/ሮ ሰላማዊት ዳዊት፣ የክልሉና የከተማ አስተዳደሩ የስራ ሃላፊዎች እንዲሁም የፕሮጀክቱ ተወካዮች በተገኙበት በይፋ ተጀመረ።

በመርሃ ግብሩ ላይ የታደሙት የኢትዮጵያ ዳያስፖራ ኤጀንሲ ዋና ዳይሬክተር ኤጀንሲው የተቋረጡ የዳያስፖራ ፕሮጀክቶችን ለማስቀጠል በትጋት እየሰራ መሆኑን የገለጹ ሲሆን፣ የክልሉና የከተማ አስተዳደሩ የስራ ሃላፊዎችም ፕሮጀክቱ እስኪጠናቀቅ ድረስ አስፈላጊውን ድጋፍ እንደሚያደርጉ ቃል ገብተዋል። የአክሲዮን ማህበሩ ተወካዮችም በበኩላቸው መሰል ፕሮጀክቶችን በተለያዩ የሀገሪቱ ከተሞች ላይ ለመገንባት ያላቸውን ፍላጎት ገልጸው፣ ፕሮጀክቱን ለማስጀመር በልዩ ልዩ የመንግስት አካላት ለተደረገላቸው ድጋፍም ምስጋናቸውን አቅርበዋል።

ፕሮጀክቱ በአንድ መቶ ሰባ ስድስት የአክሲዮን ማህበር አባላት የተቋቋመና በ10ሺ ስኩዌር ሜትር ላይ የሚያርፍ ሲሆን፣ ወደ ስድስት መቶ ሚሊዮን ብር የሚጠጋ በጀት የተያዘለት መሆኑን ከአክስዮን ማህበሩ ያገኘነው መረጃ ያሳያል። ፕሮጀክቱ ደረጃ በደረጃ እያደገ የሚሄድና ልዩ ልዩ ግንባታዎችን የሚያካትት መሆኑን ያገኘነው መረጃ አክሎ ገልጿል።

የፕሮጀክቱ ባለቤት ሳውዘርንጌት ኢንቨስትመንት አክሲዮን ማህበር በሰሜን አሜሪካ ነዋሪ የሆኑ ኢትዮጵያውያንና ትውልደ ኢትይጵያውያን በህብረት ያቋቋሙት የቢዝነስ ማህበር መሆኑን መዘገባችን ይታወሳል።

Previous Next

በአውሮፓ ህብረት ድጋፍ በኤርትራዋ ዋና ከተማ አስመራ በተካሄደና ”ስደትን ለልማት፤ የዳያስፖራውን ዕምቅ አቅም አሟጦ መጠቀም” በሚል ርዕስ በተዘጋጀ የካርቱም ፕሮሰስ መድረክ ላይ የኢትዮጵያ ዳያስፖራ ኤጀንሲ የኢትዮጵያን ተሞክሮ አቀረበ።

የካርቱም ፕሮሰስ በስደተኛ አመንጪ፣ አስተላላፊና ተቀባይ በሆኑ የአፍሪካ ቀንድና የአውሮፓ ሃገራት መካከል የተፈጠረ የትብብር ማዕቀፍ ሲሆን፣ ዓላማውም ስደትን በመተለከተ ትብብርን ሊያጎለብቱ የሚችሉ ተከታታይነት ያላቸው ውይይቶች የሚካሄዱባቸውን አውዶች ማመቻቸት እንዲሁም አባል ሃገራት ህገወጥ የሰዎች ዝውውርን ለመግታት የሚያደርጉትን ጥረት ማገዝ ነው። ከዚህም ጋር በተያያዘ ተለይተው በቀረቡ ርዕሰ ጉዳዮች ላይ የሚመክሩ መድረኮች እየተዘጋጁ በአባል ሃገራትና በባለድርሻ አካለት መካከል የልምድና የመልካም ተሞክሮ ልውውጦች ሲካሄዱ ቆይተዋል።

በአስመራ በተካሄደው መድረክ ላይ የኢትዮጵያን ተሞክሮ ለማካፈል የኢትዮጵያ ዳያስፖራ ኤጀንሲ በምክትል ዋና ዳይሬክተሩ አቶ መሐመድ እንድሪስ አማካኝነት የተሳተፈ ሲሆን፣  “የዳያስፖራ ተሳትፎ በኢትዮጵያ- የውጭ ምንዛሪና የዳያስፖራ ኢንቨስትመንትን ለመሳብ የኢትዮጵያ መንግስት የተከተላቸው ስልቶች ተሞክሮ” የሚል ሰነድ ቀርቦ ውይይት ተደርጎበታል።

በአባል ሀገራት በዝውውር በሚመራው የካርቱም ፕሮሰስ ኢትዮጵያ ከሁለት አመታት በፊት በሰብሳቢነት  ማገልገሏ ይታወሳል።

Previous Next

የኢትዮጵያ ዳያስፖራ ኤጀንሲ በደቡብ ክልል ልማት ላይ የዳያስፖራውን ተሳትፎ ማሳደግ በሚቻልበት ሁኔታ ላይ ከክልሉ ም/ፕሬዝዳንት አቶ ርስቱ ይርዳው ጋር ተወያየ።

በውይይቱ ላይ በኤጀንሲ ዋና ዳይሬክተር ወ/ሮ ሰላማዊት ዳዊት የተመራው የኤጀንሲው ቡድን የተሳተፈ ሲሆን፣ በክልሉ የዳያስፖራ ተሳትፎን ማሳደግ የሚያስችሉ ልዩ ልዩ ርዕሰ ጉዳዮች ተዳሰዋል። ከነዚህም መካከል በክልሉ ተጀምረው የተቋረጡ የዳያስፖራ ፕሮጀክቶች ላይ ማሻሻያዎችን በማድረግ ስለማስቀጠል፣ ዳያስፖራው ሊሳተፍባቸው የሚችሉ አዳዲስ ፕሮጀክቶችን አጥንቶ ስለማቅረብ፣ በደቡብ አፍሪካ የሚገኙ የክልሉ ተወላጆች ገንዘባቸውን በሕጋዊ መልኩ መላክ የሚችሉባቸው መንገዶችን ስለማፈላለግ እንዲሁም በማኑፋክቸሪንግ ዘርፍ  መሰማራት የሚፈልጉ የዳያስፖራ አባላት በኢንዱስትሪ ፓርኮች ውስጥ መሳተፍ የሚችሉበትን ዕድል ስለማመቻቸት ይገኙባቸዋል።

በመጨረሻም ሁለቱም አካላት በክልሉ የዳያስፖራውን ሁሉን አቀፍ ተሳትፎና እንቅስቃሴ  ማሳደግ በሚቻልበት ሁኔታ ላይ በጋራ ለመስራትና የበኩላቸውን ድርሻ ለመወጣት የተስማሙ ሲሆን፣ በሃዋሳ ኢንዱስትሪ ፓርክም ጉብኝት አድርገዋል።

 

Previous Next

በሴኔጋል ዋና ከተማ ዳካር በአፍሪካ ህብረት እና በተባበሩት መንግስታት ድርጅት ጥምረት በተካሄደው  ዓለም አቀፍ የትውልደ አፍሪካውያን አስር ዓመት ክፍለ አህጉራዊ ጉባኤ ላይ ለኢትዮጵያ ሽልማት ተበረከተ።

ዓለም አቀፍ የትውልደ አፍሪካውያን አስር አመት እንደ አውሮፓውያን አቆጣጠር ከ2015-2024 የሚቆይ ሲሆን፣ ዋና ዓላማውም በአለም አቀፍ የሰብአዊ መብቶች መግለጫ ላይ እንደተደነገገው የትውልደ አፍሪካውያን ክብር፣ ጥበቃና አጠቃላይ ሰብአዊ መብት እንዲከበርላቸው ድጋፍ መስጠት ነው። ይህን ዓላማ ማሳካት እንዲቻልም ክፍለ አህጉራዊ መድረኮች በልዩ ልዩ ርዕሰ ጉዳዮች ላይ በመዘጋጀት ላይ ይገኛሉ። በዚህም መሰረት በዳካሩ ጉባኤ ላይ በፓናል ውይይት ከተዳሰሱ ጉዳዮች መካከል “ለአፍሪካውያን አስተዋጽኦ እውቅና መስጠት፤ የአፍሪካን ታሪክ እንደገና መጻፍ” እንዲሁም  “በአፍሪካና በትውልደ አፍሪካውያን መካከል ድልድዮቹን መገንባት” የሚሉት ይገኙባቸዋል።

ኢትዮጵያን በመወከል በጉባኤው ላይ የተሳተፉት የኢትዮጵያ ዳያስፖራ ኤጀንሲ ዋና ዳይሬክተር ወ/ሮ ሰላማዊት ዳዊትም ኢትዮጵያ በልዩ ልዩ የዓለም ክፍል የሚገኙ የዳያስፖራ አባላትን ለማሳተፍ ላደረገችው ጥረትና ለመላው አፍሪካውያን በተለይም ለራስ ተፈሪያውያን ባደረገችው አስተዋጽኦ የተዘጋጀላትን ሽልማት ተቀብለዋል።

ከኢትዮጵያ በተጨማሪ ናይጄሪያ፣ ቱኒዚያና ኬንያም የሽልማቱ ተቋዳሾች ነበሩ።

Previous Next

የኢትዮጵያ ዳያስፖራ ማህበርን ለረዥም አመታት በፕሬዝዳንትነት ያገለገሉት ዶ/ር አለባቸው በየነ ከዚህ ዓለም በሞት ተለዩ።

ዶ/ር አለባቸው በየነ ከኢትዮጵያ ዳያስፖራ ማህበር ቀደምት መስራቾች አንዱ የነበሩ ሲሆን፣ ለረዥም አመታትም ማህበሩን በፕሬዝዳንትነት አገልግለዋል። ህይወታቸው እስካለፈበት ዕለት ድረስም ማህበሩን በቦርድ አማካሪነት ሲያገለግሉ ነበር።

በማዕድንና ኤነርጂ ኢንቨስትመንት ዘርፍ ተሰማርተው የነበሩት ዶ/ር አለባቸው፣ ባለፈው ቅዳሜ ባጋጠማቸው ድንገተኛ ሕመም በተወለዱ በ68 ዓመታቸው ከዚህ ዓለም በሞት ተለይተዋል።

ዶ/ር አለባቸው የአንዲት ሴትና  የሁለት ወንዶች ልጆች አባት ነበሩ።

የኢትዮጵያ ዳያስፖራ ኤጀንሲም በዶ/ር አለባቸው በየነ ሞት የተሰማውን ሃዘን እየገለጸ፣ ለወዳጅ ዘመዶቻቸው መጽናናትን ይመኛል።

የቀብር ስነ-ስርዓታቸውም ዛሬ ከቀኑ በ8:00 ሰዓት በቅድስት ስላሴ ካቴድራል የሚፈጸም መሆኑን ከኢትዮጵያ ዳያስፖራ ማህበበር ያገኘነው መረጃ ያሳያል።

Previous Next

ክቡር የኢ.ፌ.ዲ.ሪ ጠ/ሚኒስትር ዶ/ር አብይ አህመድ የ2019 የኖቤል የሰላም ሽልማት አሸናፊ ሆነው መመረጣቸውን ምክንያት በማድረግ "ሽልማቱ የሕዝቦች እኩልነትና ፍቅር፣ የሀገር አንድነትና ዘላቂ ሰላም ለማረጋገጥ የተጀመረውን የለውጥ ጉዞ ከዳር ለማድረስ እንደ ስንቅ የሚያገለግል ነው" በሚል መሪ ቃል የኤምባሲው ሰራተኞች፣ ኢትዮጵያውያን፣ ትውልደ-ኢትዮጵያውያንና የኢትዮጵያ ወዳጆች የተሳተፉበት የደስታ መግለጫ መድረክ ጥቅምት 7 ቀን 2012 ዓ.ም በኤምባሲው ተካሂዷል።

በኩዌት የኢ.ፌ.ዲ.ሪ ልዩ መልዕክተኛና ባለሙሉ ሥልጣን አምባሳደር አብዱልፈታህ አብዱላሂ በዚሁ መድረክ ላይ ባደረጉት ንግግር ጠ/ሚኒስትር ዶ/ር አብይ ወደ ሥልጣን በመጡ በአጭር ጊዜያት ውስጥ በሀገሪቱ የነበረውን አስቸኳይ ጊዜ አዋጅ እንዲነሳ ከማድረግ ጀምሮ በሺዎች የሚቆጠሩ እስረኞች እንዲፈቱ አድርገዋል፣ ከሃገር ውጭ የነበሩ በርካታ ተቃዋሚ ፖርቲዎች ወደ አገር ውስጥ ገብተው በሠላማዊ መንገድ የሚሰሩበትን ሁኔታ አመቻችተዋል፣ እንዲሁም የካቢኔ አባሎቻቸው 50 ፐርሰንቱ ሴቶች እንዲሆኑ በማድረግ የሴቶች የፖለቲካ ተሳትፎ እንዲጨምር አድርገዋል ብለዋል።

አምባሳደሩ አክለውም ጠ/ሚኒስትር ዶ/ር አብይ በአገራችን የዴሞክራሲ ተቋማትን በመገንባት፣ በኢትዮጵያ እና ኤርትራ መካከል የነበረውን ለሁለት አስርት ዓመታት የዘለቀ ቅራኔ ወደ ሠላም በመመለስ፣ በሱዳንና ደቡብ ሱዳን የነበሩ ችግሮች እንዲፈቱ ያደረጉት ጥረትና ያስመዘገቧቸው ስኬቶች ለሽልማት ያበቋቸው መሆናቸውንም ገልጸዋል።

በኩዌት የኢትዮጵያውያን ኮሚኒቲ ተወካዮችን ጨምሮ በመድረኩ ተሳታፊ የነበሩት የሀይማኖት አባቶች፣ የወጣቶችና የሴቶች ተወካዮች ባደረጓቸው ንግግሮችና በሰጧቸው አስተያየቶች የጠ/ሚኒስትሩ ሽልማት የእርሳቸው ብቻ ሳይሆን የመላው ኢትዮጵያውያን፣ ብሎም የአፍሪካውያን ህዝቦች ጭምር መሆኑን በመጠቆም የተሰማቸውን ደስታ ገልጸዋል።

ተሳታፊዎቹ የክቡር ጠቅላይ ሚኒስትሩ የአጭር ጊዜ ስኬት በተሰማሩባቸው የሥራ መስኮች ሁሉ ጠንክረው በመስራትና በአንድነት በመቆም በቀጣይ ለሚደረጉ አገራዊ የልማት እንቅስቃሴዎች የሚኖራቸውን ተሳትፎ እንደሚያነቃቃው ገልጸው፣ ሁሉም ዜጋ ከጠ/ሚኒስትሩ ጎን እንዲሰለፍ ጥሪ አቅርበዋል።

 
Previous Next

ላለፉት ስምንት ዓመታት በሐዋሳ ከተማ ሊገነባ ታስቦ በልዩ ልዩ ምክንያት ሲጓተት የቆየው ዘመናዊ የገበያ ማዕከልና የቢሮዎች ህንጻ ግንባታን ለማስጀመር የቅድመ ዝግጅት ስራዎች መጠናቀቃቸውን ከሳውዘርንጌት ኢንቨስትመንት አ/ማ የተገኘው መረጃ አመላከተ።

የሳውዘርንጌት ኢንቨስትመንት አ/ማ በሰሜን አሜሪካ ነዋሪ የሆኑ ኢትዮጵያውያንና ትውልደ ኢትይጵያውያን በህብረት ያቋቋሙት የቢዝነስ ማህበር ሲሆን፣ በሐዋሳ ከተማ ዘመናዊ የገበያ ማዕከልና የቢሮዎች ህንጻ ኮምፕሌክስ ለማስገንባት እንቅስቃሴ ሲያደርግ ቆይቶ የቅድመ ዝግጅት ስራውን አጠናቋል። ፕሮጀክቱ ካለው ግዝፈትና ፋይዳ አንጻር ባለድርሻ አካላትና የሚመለከታቸው የስራ ሃላፊዎች በተገኙበት የግንባታ ስራው ሕዳር 20 ቀን 2012 ዓ/ም በይፋ ይጀመራል።

ፕሮጀክቱ ወደ ስድስት መቶ ሚሊዮን ብር የተበጀተለት፣ በ10ሺ ስኩዌር ሜትር ላይ የሚያርፍ፣ በአንድ መቶ ሰባስድስት የአክሲዮን ማህበር አባላት የተቋቋመና ደረጃ በደረጃ እያደገ የሚሄድ መሆኑን ከአክስዮን ማህበሩ ያገኘነው መረጃ ያሳያል።

Previous Next

የደቡብ ሱዳን የኢትዮጵያ ዳያስፖራ ኮሙኒቲ አደረጃጀትን ለማጠናከር በማለም የአጀረጃጀቱ ጠቅላላ ጉባዔ ዛሬ ጥቅምት ፱ ቀን ፳፻፲፪ ዓ.ም. በፓልም አፍሪካ ሆቴል ተካሄደ።

የጉባዔው የክብር እንግዳ የሆኑት በደቡብ ሱዳን የኢ.ፌ.ዲ.ሪ. ልዩ መልዕክተኛና ባለሙሉ ሥልጣን አምባሳደር ተፈሪ ታደሰ፥ ኮሙኒቲው በደቡብ ሱዳን የሚኖሩ ኢትዮጵያዊያንን መብት ለማስከበርና ጥቅማቸውን ለማስጠበቅ በሚያስችል ቁመና ዳግም ለማደራጀት የተደረገውን እንቅሰቃሴ አድንቀው፣ ኤምባሲው እና ኮሙኒቲው ከመቼውም ጊዜ በበለጠ ተደጋግፈውና ተቀናጅተው ይሰራሉ ሲሉ ገልጸዋል።

የኮሙኒቲው አመራሮች የአደረጃጀቱን የሁለት አመት የአፈጻጸም ሪፖርትን ለተሳታፊዎች አቅርበዋል።

ሪፖርቱን ያዳመጡት የጉባዔው ተሳታፊዎች በኮሙኒቲው የሁለት አመት እንቅስቃሴ ዙርያ አስተያየቶችን ሰጥተው፣ መፍትሔ በሚያሻቸው ጉዳዮች ላይ ጥያቄዎችን አቅርበዋል። ለተነሱ ጥያቄዎች የኮሙኒቲው አመራሮች ምላሽ ሰጥተዋል።

ጉባዔው ነባር የኮሙኒቲው አመራሮችን ላበረከቱት አስተዋጽኦ ምስጋና በማቅረብ፣ በቀጣይ ኮሙኒቲውን የሚመሩ አዳዲስ አመራሮችን መርጧል። ክቡር አምባሳደር ተፈሪ ለአዳዲስ ተመራጭ የኮሙኒቲ አመራሮችን የእንኳን ደስ አላችሁ መልዕክት በማስተላለፍ፣ በቀጣይ ስኬታማ አገልግሎት ለመስጠት ጠንክረው እንዲሰሩ ከአደራ ጭምር አሳስበዋል።

የደቡብ ሱዳን የኢትዮጵያ ዳያስፖራ ኮሙኒቲ እ.አ.አ. 2009 ላይ መመስረቱ ይታወሳል።

Previous Next

የኢትዮጵያ ዳያስፖራ ኤጀንሲ ዳያስፖራዎች በፋይናንስ ዘርፍ ያላቸውን ተሳትፎ ማሳደግ በሚቻልበት ሁኔታ ላይ ከባንኮች ጋር በውጭ ጉዳይ ሚኒስቴር መሰብሰቢያ አዳራሽ ውይይት አካሄደ።

በኤጀንሲው ዋና ዳይሬክተር / ሰላማዊት ዳዊት በተመራው የውይይት መድረክ ላይ የመንግስትና የግል ባንኮች የስራ ሃላፊዎች በተሳታፊነት የተገኙ ሲሆን፣  የኤጀንሲው ተግባርና ሃላፊነት እንዲሁም የዳያስፖራ ተሳትፎን ለማሳደግ በኤጀንሲው እየተሰሩ ያሉ ስራዎች ቀርበዋል። ባንኮችም በበኩላቸው ለዳያስፖራ ስላመቻቿቸው ፓኬጆች፣ስለሚሰጧቸው የአገልግሎት አይነቶች፣ ከዳያስፖራ የባንክ አገልግሎት ጋር በተያያዘ እያጋጠሟቸው ስላሉ ተግዳሮቶችና መወሰድ አለባቸው ባሏቸው የመፍትሔ እርምጃዎች ላይ ሃሳባቸውን አጋርተዋል።

ከዳያስፖራ የባንክ አገልግሎት ጋር በተያያዘ በባንኮቹ ከተጠቀሱ ተግዳሮቶች መካከል የባለድርሻ አካላት ቅንጅት አለመዳበር፣ በመንግስታዊ ተቋማት የሚወጡ መመሪያዎች በየጊዜው መለዋወጥ፣ ዳያስፖራዎች የተሳሳተ መረጃ ይዘው የባንክ አገልግሎቶችን መጠየቅና ምላሹም አሉታዊ በሚሆንበት ወቅት ቅሬታ ፈጥሮ መሄድ፣ ሊያከናውኑ ላሰቡት ስራ የሚሆን በቂ ካፒታል ሳይይዙ የባንክ አገልግሎትን መጠየቅ እንዲሁም የተንዛዛ ቢሮክራሲያዊ አሰራር መኖር ጥቂቶቹ ናቸው።

በባንኮቹ የቀረቡትን ተግዳሮቶች አስቀድሞ በመገንዘብ ኤጀንሲው በመሰራት ላይ እንደሚገኝ ዋና ዳይሬክተሯ አብነቶችን በማንሳት ያብራሩ ሲሆን፣ በቀጣይም ችግሮቹ እስኪቀረፉ ድረስ ኤጀንሲው ባለድርሻ አካላትን በማስተባበር ያላሰለሰ ጥረት ማድረጉን እንደሚቀጥል ገልጸዋል።

በመጨረሻም የመድረኩ ተሳታፊዎቹ የግንኙነት ጊዜያቸውን ስለመወሰን፣ የዳያስፖራ ፋይናን አገልግሎትን በተመለከተ ከኤጀንሲው ጋር በቅንጅት መስራት ስለሚቻልበት ሁኔታና የዳያስፖራ ባንክ አገልግሎቶችን የሚያስተዋውቅ የጋራ ቡክሌት ስለማዘጋጀት በቀረበው ምክረ-ሃሳብ ላይ በሙሉ ድምጽ በመስማማት ውይይታቸውን አጠናቀዋል።

Previous Next

በዝግጅቱ የተገኙ የኃይማኖት አባቶች ባስተላለፉት መልዕክት ሽልማቱ የሁሉም ኢትዮጵያውያን መሆኑን በመግለፅ ከዚህ ዕውቅና በመነሳት ለላቀ አንድነትና ብልጽግና መነሳት አለብን ብለዋል። ኢትዮጵያዊያን ከጠቅላይ ሚኒስትሩ ጎን በመቆም ለጀመሯቸው አገራዊ እቅዶች መሳካት የበኩላቸውን ሚና እንዲወጡም ጥሪ አቅርበዋል።

አምባሳደር ፍፁም አረጋ በበኩላቸው ሽልማቱ መላ ኢትዮጵያውያንን ያኮራ፤ ከተባበርን የማናስመዘግበው ስኬት እንደሌለ አይነተኛ ማሳያ ነው ሲሉ ገልፅዋል።

ይህን ደማቅ ኘሮግራም ላስተባበሩ አካላትም ምስጋና አቅበዋል።

ዝግጅቱን የተካሄደው የዋሽንግተንና አካባቢው የኢትዮጵያ ዳያስፖራ ትረስት ፈንድ ተወካዮች፣ የዳያስፖራ አባላት እና በኤምባሲው አስተባባሪነት ነው።

 

Previous Next

የኢትዮጵያ ፌዴራላዊ ዲሞክራሲያዊ ሪፐብሊክ የህዝብ ተወካዮች ምክር ቤት የኢትዮጵያ ተወላጅ የሆኑ የውጭ ዜጎች በመድንና በአነስተኛ ፋይናንስ ዘርፍ እንዳይሰማሩ የሚከለክለውን ህግ ለማንሳት የቀረበውን ረቂቅ አዋጅ አፀደቀ።

እንደ ፋና ብሪድካስቲንግ ኮርፖሬት ዘገባ አዋጁ ትውልደ ኢትዮጵያዊያን በመድን ስራ እና በአነስተኛ ፋይናንስ ዘርፍ ላይ እንዳይሳተፉ የተጣለውን የህግ እገዳ በማንሳት በዘርፉ መዋእለ ነዋያቸውን እንዲያፈሱ የሚፈቅድመሆኑን በላይ፣ በስራ ላይ አስቸጋሪ ሆነው ከተገኙ የአዋጁ አንቀጾች መካከል በአጭር ጊዜ መሻሻል የሚችሉትን በማሻሻል በአሰራር ላይ የሚያጋጥሙ ችግሮችን ለመፍታት እንዲሁም በዘርፉ በተሰማሩ አካላት ይነሱ የነበሩ ቅሬታዎችን ለመቅረፍ የሚያስችል መሆኑ ተብራርቷል።

የምክር ቤቱ አባላት ክልከላው መነሳቱ ስለሚያስገኘው ጠቀሜታ፣ ዘርፉን እንዲቆጣጠር የተቋቋመው አካል ስላለው አቅም ጥያቄዎችን ያቀረቡ ሲሆን፣ ክልከላው መነሳቱ በተለይም ህገ ወጥ የገንዘብ ዝውውርን ለመቅረፍ አይነተኛ ሚና እንዳለውና የመቆጣጠር አቅምን ማሳደግ የሚያስችሉ ልዩ ልዩ የህግ ማዕቀፎችም በስራ ላይ እንዳሉ ማብራሪያ ተሰጥቷል።

ምክር ቤቱ በውጭ የሚኖሩ ኢትዮጵያውያን በባንክ ዘርፍ እንዲሳተፉ የሚፈቅደውን አዋጅ ከወራት በፊት ማጽደቁ ይታወሳል።